امتي احتاج طبيب نفسي.. !؟

كتير مننا بيحاول يتواصل مع طبيب نفسي وبيتعرض لضغوطات زي انت مش مجنون عشان تروح لدكتور نفسي ، انت تقدر تحل مشاكلك بنفسك ، انت مفيكش حاجة .. اللي بيروح لدكتور نفسي بيبقي مجنون
وكلام كتير من النوع ده ... 😕
طيب امتي الشخص يحس بضرورة اتجاهه لطبيب نفسي .. !؟
وامتي يحس انه مريض مش مجرد ضغوطات عادية .. !؟
وامتي يكون بيتدلع ومش محتاج لحاجة وان كل اللي بيتعرضله هي مشاكل بسيطة مش محتاجة استشارة طبيب نفسي  ... !؟
👇
👇
👇
👇
👇
👇
👇
كل الأسئلة دي هنعرفها هنا
اولا احب أنوه لحضرتك علي حاجة الدكتور النفسي بيزوره الشخص السليم والمضطرب. والمجنون والعادي .. مشكلة مجتمعنا العربي انه يفتقر للثقافة النفسية وميعرفش ان المشكلات والازمات النفسية هي اللي بتتعبنا جسديا لذلك مصمم ان اللي بيروح يكشف نفس بيبقي مجنون .. هأعطيكي مثال اصحاب الفشل الكلوي من سماتهم النفسية الغضب والتفكير التشاؤمي واصحاب القولون العصبي معظمهم اتعرض للصدمات النفسية والقلق واصحاب اضطرابات النطق بعضهم اتعرض للتحرش الجنسي وصدمات الطفولة او العنف الجسدي في الصغر او فقر الخبرات وهكذا  هنا الناس بتفكر ان العادات الغذائية والاهتمام الصحي بس هو اللي هيحمينا .. لكن ميعرفوش ان كل فشل بنتعرضله وكل مشاعر بنكبتها بتهد في جسمنا كل يوم واحدة واحدة وكل مرض جسدي له بعد نفسي وكل شعور سلبي جوانا بنكبته بيتحول لعضو من أعضاء الجسم وبيدمره بالبطئ.. حاجة كمان التربية عندنا في مصر للأسف عبارة عن سلق بيض حضرتك يعني الولد ياكل ويشرب وينام ويذاكر المنهج يبقي تمام وزي الفل مفيش غرس قيم ولا تحديد هوية ولاتعليم تفكير ولا تنمية مهارات وقدرات ولارعاية موهبة وده اللي بيخلي الناس تفتكر ان ابنها لما يتعرض لمشكلة المفروص يحلها تلقائيا دون مساعدة اي شخص علي الرغم ان محدش علمه مهارة حل المشكلات وهنا بتبدأ المشكلة والضغط علي الطفل او الشاب عشان يساعد نفسه مبيعرفش فبيتعرض لضغط نفسي وقلق بيحاول يستخدم حيل نفسية وبيبقي جواه صراع بيحاول يزعق يضرب المحيطين المدرسة تفصله وتيجي تقوللي في النهاية ابني اترفد انا حاسة ان عنده مشكلة او ابني طلق زوجته ومش عارف يقعد في شغلانة ومش عارف يبقي اجتماعي ... الخ ودي في حد ذاتها مشكلة لانها نسيت تقوم بدورها ونسيت كمان تعرضه علي طبيب نفسي عشان يرشدها ازاي تغرس فيه المهارات دي قبل ما يتعرض لمشكلة فهما مش مؤمنين بالدور الوقائي والتنموي للطبيب او المعالج النفسي اللي ممكن يقعد معاه شخص سوي نفسيا عشان يزوده بمهارات تعينه في مواقف حياتية جديدة زي الزواج والمهنة والأبوة او يستبصر بنفسه وبحياته ويتعرف عليها اكتر ويدرك نقاط قوته ونقاط ضعفه ايه ويحسنها وهكذا .. 

طيب امتي يتجه الشخص لمريض نفسي فده حسب المرض نفسه اللي بنراعي فيه عدد الاعراض وتأثيرها علي الجوانب الحياتية ( علاقات زواج مهنة تفكير مستوي نشاط ) وشدة الاعراض وتكرارها ومدة ظهورها هأعطيكي مثال انا لما آجي مثلا أشخص قلق الانفصال هأشوف فيه ع الاقل توافر ثلاث اعراض من مجموعة الاعراض دي ( انزعاج متكرر عند توقع او حدوث انفصال عن البيت او الاشخاص اللي متعلقة بيهم ، خوف مستمر ومفرط يتعلق بالفقدان ، خوف من الاحداث التشاؤمية ، رفض الذهاب للخارج زي المدرسة او السفر ، خوف من الوحدة ، رفض النوم خارج البيت او بعيد عن الاشخاص اللي متعلقة بيهم ، كوابيس عن الانفصال والموت والهجر ، شكاوي من الصداع او آلام المعدة وقت حدوث الانفصال ) ويلزم عشان اقول قلق انفصال يبقي فيه ثلاث اعراض ظاهرين ومستمرين عندي ومتكررين يوميا تقريبا في الطفل  والمراهق اربع اسابيع كاملة وعند البالغ ست شهور ... هنا اقدر اقول ده مرض نفسي اسمه قلق الانفصال ولازم تذهب لطبيب يعالجك ، عندك الاكتئاب مثلا لازم يكون عند الشخص خمس اعراض ع الاقل من الاعراض دي ومستمرة تقريبا يوميا لمدة اسبوعين كاملين ( مزاج اكتئابي ، فقدان الاهتمام والاستمتاع ، فقدان الوزن او زيادته ، أرق ، انخفاض النشاط الحركي او زيادته يوميا ، الاحساس بالتعب ، عدم الشعور بالأهمية ، الشعور المفرط بالذنب ، نقص القدرة علي التركيز ، تكرار افكار الموت ) وهكذا كل مرض ليه أعراض وله فترة زمنية محددة وده اللي بيحددلي انه مرض نفسي او مجرد موقف طارئ ( الاعراض ، شدتها ، مدتها ، جوانب تأثيرها ع حياة المريض ) اما اذا كان الموضوع مجرد موقف طارئ واتحل او حسيت بالضعف فيه لكن عدي او حسيت مرة بالذنب اني مخدتش حقي ، او تجنبت بعض الناس اللي بتستفزني او اتعرضت لمشاكل في الشغل لكن قاومت وحلتها او لجأت لمساعدة من شخص كبير مثلا وساعدك وكان كل ده مش بيظهر الا في فترات متباعدة ممكن كل شهر او شهرين ومظهرش أعراض جسدية علي الشخص يبقي موقف مؤقت مش محتاج طبيب نفسي 

طيب إمتي تتكلم مع معالج نفساني ... !؟ 

🎈 لما أحاسيسك السلبية زي العجز والحزن تبقي كبيرة جدا ومطولة معاك .

🎈 لما مشاكلك مش بتتحسن ولا بتتحل علي الرغم من جهودك المستمرة وجهود اللي حوليك في حلها .

🎈 لما تحس انك مش قادر تنفذ وتنجز المهام الحياتية اللي بتواجهها يوميا .

🎈 لما تقلق بشكل زائد عن الحد ودماغك متوقفش تفكير .

🎈 لما تصرفاتك تبدأ تإذيك وتإذي اللي حوليك .

🎈 لما متقدرش تستمتع بكل اللي كنت بتسمتع بيه زمان

🎈لما تتجمع معاك زملة او مجموعة اعراض وتعوقك عن ممارسة حياتك
باختصار كل مرض وليه اعراض معينة ومدة معينة وتأثيرات معينة  عشان اقدر أقول ان ده مرض وبيخضع لمعايير أثناء التشخيص بنراعي فيه التشخيص الفارق وعدم وجود تأثيرات لأدوية أو مواد كحولية و مش أي حدد يشخص ومش أي حد يقول علي نفسه مريض نفسي والمريض بعدها بيخضع لاختبارات تحددلي شدة المرض وبناقش معاه طرق العلاج هو واسرته اما اذا كان مش مأثر علي جوانب حياته او احساس عابر نتيجة موقف واحد وحياته ماشية عادي دراسة وشغل وعلاقات وانتاجية عالية وبيقدر يستمتع من وقت للتاني بالحياة يبقي كويس ومش محتاج طبيب نفسي
🎀 دكتور سمر محمد استشاري اسري تربوي معالج سلوكي 🎀