اصحاب ولا اخوات ولا أحباب .... !؟

اولا المقال موجه لكل بنوتة في علاقة معينة سواء صداقة او عمل او حتي ارتباط عاطفي بينها وبين شخص لكن مش متأكدة هل هيتجوزها ولا هيخلع 😂
العلامة الاولي ان الرجل اللي بتظهري معاه يشهر بحبه ليكي قدام الناس ويعيطي لقب يعني ايه يا افندم يعني لما تظهروا مع بعض في اي مناسبة يعرفك انك حبيبته زوجته المستقبلية شريكة حياته المهم هتستنجي من اللقب انك جزء من حياته الجاية .. انما لو عرفك لاصدقاؤه انك صديقة او زميلة بالعمل او حتي بمجرد اسمك فأنصحك تبعدي عنه
العلامة التانية انه يصرف عليكي لان كل رجل عنده حس مسئولية وقوامة لاهل بيته ده الدور الطبيعي اللي اتخلق عليه هتلاقيه دايما بيعطيكي فلوس لما بيعزمك بيحاسب لما بتخرجوا مع بعض بيتكفل هو بالليلة كلها بيشحنلك موبايلك لو شغلك اتعطل بيسندك ماديا .. طيب هو افرضي معهوش يعمل كل ده ...ممكن تلاقيه اصحابه بيجاملوه عشان يبان قدامك راجل او بيدخل حد من علاقاته عشان يصلحلك حاجة بالبيت او بيوصي واحد صاحبه علي تخفيض اسعاره ليكي او يبيع حاجة مستعملة من عنده عشان يكفيكي وهكذا ...
العلامة التالتة انه يحاول يحميكي ويدافع عنك ضد اي شخص او اي مرض هو مش هيقعد يعملك كمادات مثلا طول الليل لكن هيبقي حريص يوديكي المستشفي ويجيبلك الدواء ويجيب حد يعتني بيكي  والصفة دي عادة بتظهر في التحكمات بتاعة الرجل اللي هي متخرجيش بالليل .. مترديش علي رقم غريب متسافريش لوحدك ... حتي لو بتمارسي هواية فيها حس مغامرة ممكن يمنعك عنها زي مثلا البنات اللي بتحب تنزل البحر كتير لمسافات بعيدة او تلبس بدلة الغطس وتتفرج علي الشعب تحت البحر ... ممكن بس لو توهتي عن عنيه يتجنن ويحاول ينزل يجيبك بنفسه ولو مبيعرفش يعوم تلاقيه قلب الشط كله عصبية وزعيق وجاب رجال انقاذ عشان تجيبك من مكان انتي بتستمتعي فيه لكن بالنسبة ليه هو فيه نسبة خطر وده نابع من احساسه انك مسئولة منه وان توفير الأمان ليكي جزء من رجولته مينفعش يتخلي عنها

العلامات دي هتبقي موجودة في شخص هو مأمن مستقبله المادي أصلا يعني عنده شغل ثابت وعارف ان يقدر يفتح بيت لان الرجل مبيفكرش في ارتباط الا لما يحقق ذاته علي المستوي المهني فلو موجودة في حد تعرفيه اعرفي انك مهمة عنده وانه هيطلب ايدك قريب بإذن الله المسألة مسألة وقت فالله يخليكي متفرطيش فيه واصبري تنولي