المدح وسنينه

#لا_تقطعوا_أعناق_أحبابكم
النبي عليه الصلاة والسلام وصف
مَن يُكثِر في مدح صاحبه كالذي يقطع عُنقه
#فاحفظوا_قلوبهم_من_العُجب
#واحفظوهم_من_مداخل_الشيطان .. انا معرفش مدي صحة الحيث ده لكن وجهة نظري هي كالأتي :-
بقول ان كتر المدح احيانا بيقودنا للعبودية النفسية والذهنية بسبب اعتقادنا ان نجاحنا او افعالنا مرهونة برضي فئة معينة من الناس او سخطهم وعقابهم لينا لو حتي بالنظرة الجارحة  او اني لو عملت شئ مثلا ممكن يزعلهم فلازم معملهوش  ... !
وفي اعتقادي ان احنا اللي بنصنع عبوديتنا دي والمجتمع بيساعد برضه علي ده ..  لاننا دايما بننتظر المدح والثناء علي اي شئ احنا بنعمله لو حتي لنفسنا او اهتمامنا باسرتنا او نجاحنا حتي في شغلنا .. !
ولو افعالنا معجبتش بعض الناس او ناس بنحبهم بنشك فيها وبنفقد الثقة في نفسنا وبنزعل أووي ان احنا مقدرناش نعجب الكل .. لكن صدقني انك تعجب الكل ده في حد ذاته فشل نفسي بيبدأ من نفسك وبعدين بينعكس علي حياتك كلها .. لان بغض النظر عن محاولاتك للوصول للكمال وانك تبقي افضل من شخص معين ( حتي لو بقيت افضل منه ) هييجي يوم هتحس انك مقصر جدا مع نفسك وهتحبط لان دايما هيظهر شخص افضل منك ...  متحاولش توصل للكمال الكمال لله وحده :) حاول تبقي نفسك .. متدخلش نفسك في لعبة المقارنة السخيفة دي لان مش ممكن حد يفوز بيها ابدا .. بص لقدراتك وامكانياتك واقتنع بيها واشتغل علي حالك اكتر عشان تعجب نفسك مش الناس .. وبلاش تفكروتقول  الناس بتفكر فيا ازاي .. لانك هتتصدم بجد لما تعرف انهم مش بيفكروا فيك اصلا وان كل واحد مبيفكرش الا في نفسه بس واذا فكر فيك يبقي قليل جدا وهيفكر هو هيستفيد منك ومن افكارك وشغلك  ونجاحك ده ايه ..!؟
.فاذا كنت عايز تتحرر فعلا وتثق في نفسك بطل شوية تلتمس الاستحسان والحب والثناء من اللي حوليك وعشان تقدر تعمل ده يبقي لازم تبطل تشوف الناس افضل منك لانك لو عملت كدة هتثق في نفسك اكتر ومش هتضطر تقع في مصيدة " الثناء " ومش هيرجع الثناء يغريك ولا يحفزك ولا العقاب يؤذيك ولا حاجة .. لان جوة كل شخص فينا اصلا محفز ذاتي وحكيم ومشجع ذاتي كمان عشان يقدر يحكم علي تصرفاتنا بالصح أو الخطأ ويشجعنا اننا نقوم بافعال احنا فعلا عايزين نعملها مش مضطرين نعملها  .. :)
رغم اني منكرش دور التقدير هنا وخصوصا من الاشخاص اللي بنحبهم او من أسرتنا بس فيه فرق شاسع بين الثناء والتقدير لان الثناء هنا للنفس لكن التقدير للفعل والجهد اللي قمت بيه والثناء ممكن يوصلك للغرور وممكن يضاعف الفعل لكن مع توقف الثناء هيتقوف فعلك الجيد درجة بدرجة او فجأة وهيصيبك الإحباط كمان  لانه مش هيحفزك الا تحفيز بسيط جدا ووقتي هينتهي بانتهاء الفعل  انما التقدير هيعطيك الثقة بنفسك ومفعوله واثره ع النفس بيكون أعلي وبسببه ممكن نواصل انجازاتنا  ومهوش مجاملة ولا حاجة  .. ده مجرد حكم ع الفعل مش الشخص اللي قام بالفعل وتأثيره بيدوم لان ساعتها هنثق بافعالنا ونفسنا اكثر .. :)
مثال ع الثناء : معني انك لو قلت لانسان انت رائع عشان عملك شئ كان ممكن انت تعمله بنفسك او حتي نتش تقدر تعمله  يبقي معني كدة انك حكمت ع الشخص نفسه مش فعله ومعني كدة انه كان هيبقي وحش لو مكنش عملها مثلا ! مش عارفة مين قالك تحكم عليه اصلا ولا مين عطاك الحق انك تحكم !؟
مثال بقي ع التقدير : شخص عملك مصلحة معينة او خدمك خدمة مثلا ممكن تقوله شكرا ليك .. انا مقدر " فعلك او خدمتك ليا " دي  جدا :)
متهيألي ان كل شخص فينا مش محتاج ثناء قد ما هو محتاج تقدير الاخرين لافعاله عشان يقدر يكمل .. ياريت كل شخص يتخلص من عبوديته النفسية اللي التربية والاهل والمجتمع  زرعوها فينا من صغرنا .. ياريت نتخلص من عبوديتنا النفسية اولا عشان نقدر نتحرر عقليا وفكريا ونكمل طريقنا في سلام ... <3
#سمر_محمد_ارشاد_اسري