نقطة بنفطة

في بعض الحالات الزوجية  اللي بتتحول فيها المشكلات لطار ومعركة شرسة بين الطرفين وكل شخص بيحاول يكسب الجولة ومصر انه يفوز ممكن نستخدم طريقة النقط  ... يعني إيه !؟
يعني مثلا نحسب لكل شخص نقط الفوز بتاعته ع الطرف الاخر .. أي أذية سببهاله بنقطة وأي نتيجة للأذية دي بنقطة يعني زي مثلا شتم زوجته دي نقطة والأثر النفسي للشتيمة دي عليها بنقطة لو اتقالت قدام حد تبقي اهانة وتبقي كمان نقطة وقدام الاولاد بتبقي نقطة تانية لان هنا حطم هيبتها قدام الأولاد ولو هي مردتش عليه بنقطة لان هي كدة مخدتش حقها .. مردتش علي مكالمتها بتقطة وانها زهقت نتيجة عدم الرد بكمان نقطة ..  نجمع كل افعاله اللي أذيتها سواء نفسيا وماديا واجتماعيا وأثر كل الافعال دي عليها نفسيا واجتماعيا وماديا .. الخ طول فترة الخلاف والارتباط برضه ... يعني السبب بنقطة والنتائج كمان علي كل مستوي بنقطة وعدم الرد علي كل ده بنقطة للطرف الاول والرد طبعا بنقطة للطرف التاني لحد ما تلاي الشخص اللي مصمم يفوز في المعركة معاه نقط كتير جدا .. نعمل كدة بقي مع كل طرف ونحاول نجمع النقط ونقنع كل طرف انه خلاص انتصر ع التاني لان معاه نقط كتير ...ده طبعا عشان وقت الغضب بيبقي مصر علي هدف ولازم يحققه .. وماله خليه يحققه أو إوهمه انه حقق انتصارات كبيرة جدا ع الطرف التاني ممكن نفسيته ترتاح انه انتصر .. بس خلي بالك واستخدم الطريقة دي بحذرلان الموضوع ده ممكن يبقي عكسي مع الشخصيات اللي بتعشق الانتقام من البشر ...وتلاقيها قلبت وزودت وحست بمتعة النصر وقالت كمان كمان .. لو هو من الشخصيات العنيفة اللي بتحب الانتقام بلاش تستخدمها .. لانه هيتحول لوحش ساعتها ومش هنعرف نوقفه !
إنما لو الاستراتيجية دي نجحت نشتغل بعدها علي طول في الحل إما المعاشرة بالمعروف ونحاول نصلح بعد ما كل شخص ارتاح نفسيا سواء أخد حقه أو الغضب اللي جواه راح  أو المفارقة بالمعروف ويتم للأسف أبغض الحلال وده في الحالات الصعبة جدا اللي لسة مش قادرة تتخلص من مشاعرها وافكارها السلبية اثناء التجربة  !
#سمر_محمد_إرشاد_أسري